Okay si Mayora Iday sa Seawall ni Cong. Mark

 

                                   BASTA WALANG PANANAGUTAN ANG MUN.

Ni Mortz C. Ortigoza

LINGAYEN, Pangasinan – Sinasang-ayunan ng bagong alkalde dito ang proyektong concrete seawall ni Pangasinan 2^nd District Cong. Mark O. Cojuangco basta walang pananagutan ang munisipyo kung magkaprublema ng legal ito.

SEAWALLS. The still unfinished concrete seawalls at the beaches of Lingayen, Pangasinan (top photo). Pangasinan 2^nd District Cong. Mark O. Cojuangco (right photo below) and his political ally Lingayen Mayor Josefina “Iday” F. Castañeda. Photos grab from the internet

Ani Mayor Josefina “Iday” F. Castañeda na “okay’ lang sa kanya basta may kumpletong mga legal na papeles ang pambansang ahensya na namumuno sa P185 million proyekto sa tabing dagat ng Barangays Pangapisan, Maniboc at Libsong dito.

Ang proyektong seawall ng Department of Public Works and Highway ay aabot hanggang karatig bayan ng Binmaley.

Noong taong 2023 nakatanggap sa national government ng P75 million pondo ang 940-meter na mga file sheet na seawall. Ngayong 2025 ay meron siyang panibagong budget na P100 million para sa 1,378–meter sa dagdag na mga seawalls.

Ani Mayora Castaneda na pinagaaralan ng mga abugado ng local government unit dito ang mga papeles at ang panayam nila kay Cojuangco at mga kinauukulang ahensya ng gobyerno tungkol sa proyekto. “Pinagaaralan ng mga ano natin.. si Attorney (Legal Officer Nepthalie) Pasilao at saka si Attorney Kap pinagaaralan nila. Pumunta sila kay Congressman ewan ko kung ano ang pinag-usapan nila. Tapos kumuha si Attorney Nep ng letter na “angapoy bilang walay problema, angapo agda sisi-on so municipal,” paliwanag ni Mayora sa Tagalog at Pangasinan sa writer na ito.

Bago ang positibong pahayag ni Mayora sa seawall, ang pagpapatayo nito ay nabinbin ng ilang taon matapos harangan ng kanyang hinalinhan na si dating mayor Leopoldo Bataoil. Kahit na pinayagan na ng mga kasapi ng Sangguniang Bayan dito sa isang resolution ang pagpagawa ng proyekto ay mariing tinutulan pa rin ni Bataoil ito dahil sa environmental issue.

Nagpainit sa ulo ni Congressman Cojuangco ang ikinilos ni Bataoil dahil ang huli ang unang proponent ng seawall noong siya pa ay kongresman dito. Tinapos ni Bataoil ang tatlong termino niya noong Hunyo 2019.

Sa suporta ni Cojuangco, tinalo ni Castaneda si Dexter Malicdem ng 9, 782 boto noong Mayo 12, 2025. Si Malicdem ay vice mayor ni Bataoil noong alkalde pa siya dito ng anim na taon. Piniling labanan ni Bataoil si Cojuangco noong nakaraang Mayo 12 eleksyon ngunit siya ay natalo ng 162, 730 mga boto.

Mariing tinutulan ng mga mangingisda dito at sa bayan ng Binmaley ang seawall dahil ito daw ay magpapasikip sa paradahan ng mga bangka nila,  ito ay makakasira ng mga sasakyan nila dahil tatama sila sa mga konkretong proyekto, at ito ay maging dahilan ng pagkawala ng mga hanapbuhay nila.

Ang vaunted proyekto ni Cong. Cojuangco ay magbibigay ng proteksyon kontra sa palaging pagbaha sa mga kabahayan ng mga residente na malapit sa dagat sa bayan na ito at sa Binmaley.