Malinis na Parongking River, MRF Ipinagmamalaki sa Calasiao

 Ni Mortz C. Ortigoza, MPA

CALASIAO, Pangasinan – Buong pagmamalaki na ipinakita ng batang alkalde dito kung gaano na kaayos at kalinis ngayon ang Parongking River at ang material recovery facilities (MRF) sa maunlad na bayan na ito.

“Tingnan ninyo iyong dating maduming Parongking River na malinis na ngayon at iyong maayos at malinis na MRF at paligid niya,” ani Mayor Patrick A. Caramat habang pinapakita ang mga litrato na ang iba ay kuha ng drone sa writer na ito noong bumisita kamakailan ang huli sa kanyang opisina.

Sa nasabing mga larawan wala na ang mga makakapal na mga water lily at iba pa na makikita noong bumisita sa nasabing lugar si Pangasinan Governor Ramon V. Guico III at Mayor Caramat noong Pebrero 13 para umpisahan na ang malakihang paglilinis at pagdadraga ng mga makakapal na putik  at mga debris ng mga gamit sa Parongking River.

Pinasalamatan ng alkalde ang masipag na Municipal Environment and Natural Resources Office Chief Mark Paulo Caspillan at mga tauhan niya sa kanilang mandato na linisan at ayusin ang mga nasabing mga lugar.

“Gusto ko kasing laging malinis ang isang lugar kaya lagi ako umiikot sa labas ng opisina ko para makita ko ang mga sitwasyon nila,” dagdag pa ni Mayor.

“Itong Parongking River Restoration na ito po ay hindi po magagawa ng local na pamahalaan ng Bayan ng Calasiao kung walang suporta po ang provincial government of Pangasinan headed by our governor Ramon “Monmon” Guico III,” ani Mayor Caramat  sa gitna ng mga masigabong palakpakan ng mga tao na dumalo sa kaganapan noong Pebrero 13 kasama si Governor Guico.

Ang may 24 na mga barangay na landlocked bayan na ito sa central Pangasinan ay kilalang mabilis bahain at madalas magdeklara ng State of Calamity tuwing binabayo ito ng mga masamang panahon.

Noong Hulyo 2025, maraming mga barangay ang nalubog sa baha, kung saan umabot sa anim na talampakan ang tubig sa mga lugar tulad ng Poblacion West at Barangay Longos.

Ang matinding siltation o pagbabaw ng mga ilog, kabilang ang Sinucalan-Dagupan River System, ang itinuturong dahilan kung bakit matagal humupa ang baha sa bayan.

Ang nasabing River System ay nagmumula sa kabundukan ng Benguet Province at bumabagtas ng halos 80 kilometro papunta dito at sa katabing Dagupan City, kaya ang taas ng tubig sa upstream ay may malaking epekto sa sitwasyon ng baha sa downstream na mga lugar.

Ang Sinocalan-Dagupan River System ay pangunahing nakakaapekto sa siyam na bayan at lungsod sa higanteng lalawigan ng Pangasinan, kabilang ang Sison, San Manuel, Binalonan, Laoac, Urdaneta City, Santa Barbara, Calasiao, Dagupan City, at Mangaldan. Ang pag-apaw nito tuwing malakas ang ulan ay nagdudulot ng baha, partikular sa mga mabababang lugar (low-lying areas) na malapit sa ilog.

                     MATERIAL RECOVERY FACILITIES

Ang Material Recovery Facilities (MRFs) sa Barangay Malabago dito ay maayos at malinis ang pagkaplastada ng mga gusali, daanan, at mga gamit noong ipinakita ni Mayor Patrick sa writer na ito ang mga drone photos na nakunan ng munisipyo. Ang MRF doon ay idinisenyo upang ihiwalay, i-recycle, at iproseso ang mga solidong basura ng munisipyo upang mabawasan ang pagdepende ng mga nasasakupan niya sa mga landfill na sistema. Masigasig na pinagbubuti ng batang alkalde ang environmental sanitation ng MRF at naging bagay na lang ng nakaraan iyong mga reklamo ng mga residente noong mga nagtapos na mga administrasyon tungkol sa mga masangsang na amoy na nagmula sa mga naipon na basura doon.