E- rollback ang excise tax sa produktong petrolyo – Senator Bam

Mismong si Pangulong Duterte pala ang umamin na mabagal ang takbo ng ekonomiya sa ngayon. Partikular na nababahala ang Pangulo sa mabagal na galaw ng ekonomiya sa mga lalawigan dahil sa mataas na presyo ng bilihin. Sinang-ayunan naman ni Sen. Bam Aquino ang pahayag na ito ng Pangulo.

Aniya, isa sa magpapasigla sa ekonomiya, lalo na sa probinsya at kanayunan, ay ang pagpapababa ng presyo ng bilihin. Subalit sinabi ni Sen. Bam na dahil nalulunod na ang Pilipino sa taas ng presyo, ramdam na ng mamamayan ang paghina ng ekonomiya.

 Kaya naman nanawagan si Senador Bam sa Pangulo na pakinggan ang daing ng taumbayan, lalo na ang mahihirap, ukol sa mataas na presyo ng bilihin at serbisyo dahil sa Tax Reform for Acceleration and Inclusion (TRAIN) Law.

Sinabi ni Sen. Bam na sana makinig si Pangulong Duterte sa pakiusap ng taumbayan at suportahan ang kanyang panukala na i-rollback ang excise tax sa produktong petrolyo sa ilalim ng TRAIN Law.

 Isa si Sen. Bam sa apat na senador na bumoto laban sa ratipikasyon ng TRAIN Law. Ayon kay Sen. Bam, makatutulong ang pag-rollback ng excise tax sa produktong petrolyo sa pagpapababa ng presyo ng bilihin. Umaasa tayo na pakikinggan ng Pangulo ang panawagang ito ni Sen. Bam.