Bona sa mga Kritiko: Walang Ghost Workers, Anomaly sa mga Gamot

 

Ni Mortz C. Ortigoza

MANGALDAN, Pangasinan – Binira ng babaeng alkalde dito ang mga kritikong bumabanat sa kanya kahit wala silang mga basehan.

Matapang na hinamon ni Mayor Bona Fe D. Parayno ang mga detraktors niya na nagtatago sa mga pekeng account sa social media kung meron siyang pinapanatiling mga ghost employees at wala nang mga gamot sa rural health unit (RHU).

LARAWAN ni Mayor Bona Fe D. Parayno (pinaka-kaliwa) noong pinangunahan niya ang LGU Mangaldan’s 22nd Flag Raising sa Brgy. Nibaliw na naganap ngayong buwan. Kasama sa pagtaas ng bandila ay ang “Serbisyong Matibay, Walang Kapantay” na programa ng alkalde para sa kanyang nasasakupan. (Photo PIO-Mangaldan)

“Sabi nila may mga ghost employee so bakit hindi nila bisitahin ang Human Resource Management Office na may records doon. Pumunta sila doon kaysa maniwala sa mga naririnig nila,” mariin niyang binanggit.

Marubdob din niyang pinasisinungalingan ang mga kritiko na nagpapakalat na wala na daw mga gamot sa RHU para sa mga dahop dito.

“Tanungin ninyo ang mga doctors (doon sa RHU) dahil may mga records doon,” sambit ni mayora.

Dagdag pa niya na mahigit P12 million ang mga biniling gamot, bitamina, laboratory supplies, at mga kagamitang medikal para sa RHU ngayong 2024.

Noong State of the Municipal Address (SOMA) niya noong Nobyembre 30, 2024 sa Municipal Public Auditorium alinsabay sa pagdiriwang ng kanyang ika-65 na kaarawan, pinasalamatan muli ni Mayor Parayno ang mga botanteng nagluklok sa kanya noong May 9, 2022 eleksyon matapos makuha niya ang 28, 466 na mga boto laban sa dalawa niyang katungali na nakakuha lamang ng 18, 276 at 11, 948 bawat isa.

Sentro ng kanyang talumpati sa SOMA ay ang kalagayan ng primerong klaseng bayan at isa sa pinaka progresibo sa Pangasinan sa mga naisulong na niyang programa at proyekto sa loob ng isang taon at ang mga nakinbinbin at gagawin pa niyang mga plano sa susunod na taon.

Napipintong maglalaban si Parayno at Vice Mayor Mark Stephen Mejia at dating alkalde Marilyn Lambino para sa pagka alkalde dito sa Mayo 12, 2025 eleksyon.