Sual, top producer ng bangus sa bansa

Tinaguriang “The New Bangus Capital of the Philippines” ang bayan ng Sual dahil ito ngayon ang top producer ng bangus sa bansa.

Sa kasalukuyan ay mayroong 750 fish cages sa Sual Mariculture Zone at kada taon ay mayroong humigit kumulang sa 50 million pirasong bangus o 25,000 metric tons na bangus na inaani sa naturang bayan.

Ayon sa Bureau of Fisheries and Aquatic Resources,  ang bayan ng Sual ay nakakatulong ng malaki sa food security program ng bansa, lalo na sa Metro Manila sapagkat natutugonan nito ang 32 percent na pangangailangan sa supply ng bangus.

                    FISHCAGES abound in the flourishing town of Sual, Pangasinan.

Ipinagmamalaki din ng Sual na ang kanilang bangus ay export-quality at paborito na rin sa Hawaii at iba pang parte ng daigdig. Ang dahilan ay ang malinis na karagatan sa bayan ng Sual.

Nagagalak na ikinuwento ni Mayor Bing Arcinue na sa Estados Unidos kung saan ibinibenta na rin ang bangus ng Sual,  ay may “tag” pa ang mga bangus doon na “SUAL, PANGASINAN.”

“May sariling identity ang aming mga bangus. Basta nakita ng mga mamimili sa ibang bansa na may tatak na “SUAL, PANGASINAN” ang mga bangus ay segurado silang malinis at masarap, tama sa timbang, malaman at masarap,” sabi ng alkalde.

Maging sa ibang parte ng Pilipinas ay alam na alam nila kung ang bangus ay galing sa Sual sapakat mas makikintab ang mga kaliskis nito at talaga namang mas maganda ang sukat at timbang ng mga ito, dagdag pa ni Mayor Arcinue.

Sinabi pa ng mayor na nakikipagtulungan ang kanyang tanggapan sa municipal agriculture office at ang municipal environment office upang seguraduhin na napapapanatiling malinis ang kanilang karagatan.

Ang mataas na kalidad ng bangus mula sa bayan ng Sual ay patunay lamang na walang nagaganap na pollution mula nang itinayo ang Sual Coal-Fired Power Plant, ayon kay Mayor Arcinue.

Ang mga fish cages ay matatagpuan sa Baquioen Bay na malapit lamang sa kinatatayuan ng power plant sa barangay Pangascasan.

Matagal na sanang nawala ang mga fish cages kung may water pollution, giit ni Mayor Arcinue.

Dahil dito, sinabi niya na wala ng naniniwala sa Save Sual Movement na nagdudulot ng pollution daw ang Sual Power plant.

“Ang totoo, walang pollution sa bayan ng Sual kung kaya’t ito ay kinikilala ngayon bilang Bangus Capital of the Philippines,” wika ni Mayor Arcinue.