Hindi Bukol Ito, Lymphoma Ito – Bulacan Guv

Ni Mortz C. Ortigoza

Pinabulaanan ng gobernador ng Bulacan na bukol ang meron sa noo niya kung hindi ito ay lymphoma matapos na maiulat siya ng isang blogger na malapit sa Malacanang na binugbog siya ng Kalihim ng Department of Interior and Local Government (DILG) matapos i-harass ng mga tao niya ang presidential son.

BUKOL? Bulacan Governor Daniel Fernando rubs smoothly the lymphoma and not a “bukol (lump)” at his forehead he told his constituents during a flag ceremony held at the provincial Capitol in the central Luzon province. Photo is DOLA A.I generated.

“Ito po kasi lymphoma. Paano ba operahan ito?” tanong ni Fernando sa kanyang mga constituents habang hinahaplos ang bukol sa kanyang noo noong flag ceremony noong Lunes sa Kapitolyo.

 Biro pa niya, “Sabi ko na lang third eye, X-ray machine."

Wala pa ring nakuhang malinaw na sagot sa gobernador sa tunay na pangyayari sa kabila ng pagbasag niya ng kanyang katahimikan matapos maisulat ni Ramon Tulfo na sinuntok siya ng dalawang beses at sinakal ni Secretary Jonvic Remulla sa tanggapan ng huli. Ito ay matapos ireklamo siya at mga tauhan niyang tinakot si Vinni Marcos – anak ni Presidente Ferdinand Marcos, Jr. -- matapos ma-overtake ni Vinni ng kanyang Toyotal Land Cruiser ang convoy ng gobernador sa kahabaan ng Northern Luzon Express Way (NLEX) Pebrero 21 ng gabi.

Ayon kay Fernando, sapat na ang pahayag ng Malacañang at ng Land Transportation Office kung saan nakuha ng huli ang mga litrato ng mga plaka ng sasakyan na pagaari ang karamihan ng provincial government of Bulacan.

Nanawagan si Fernando sa mga bumabatikos sa kanya sa social media na maging mahinahon at maging responsable matapos na mapabalita na tinakot ng mga tauhan niya si Marcos at binugbog siya ni Remulla sa tanggapan ng huli sa Camp Crame sa Quezon City.

“Sa puntong ito, higit sa anupaman na negatibong balita na nagkalat sa social media, ang mas mahalaga sa akin ay ang inyong pagtitiwala at pagkilala sa aking pagkatao,” aniya sa mga kawani ng pamahalaan panlalawigan.

Nagpapasalamat din siya sa pag-unawa at pagmamahal sa kanya ng mga Bulakenyo:

"Salamat po at binigyan ninyo ng pagpapahalaga ang mahabang panahon ng aking tahimik na paglilingkod (magmula noong June 2019 - Author), lalo na po sa mga kapus-palad."

Inamin ni Fernando na hindi siya perpekto, pero nagsisikap daw siyang huwag magmalabis sa kapwa. “Hindi man po perpekto si Daniel Fernando, si Daniel Fernando po ay hindi perpekto, pero pinagsisikapan ko pong huwag magmalabis sa ating mga kababayan at kapwa-Pilipino. Para naman po sa ibang hindi nakakakilala sa akin at hindi pa nakikipag-ugnayan sa inyong abang lingkod, sana ay magkaroon ng pagkakataon na tayo ay lubusang magkakilala para sa lalong ikabubuti ng paglilingkod sa ating mga kababayan, lalo po ngayong naggigiyera sa Middle East," dagdag pa ng dating aktor ng “bombang” pelikulang Scorpio Nights.

Sa excerpt ng blog ni Tulfo aniya: “Hinarang ng convoy ang SUV ni Vinni. Bumaba ang ilang kalalakihan na bitbit ang kanilang mga baril. Tumawag si Vinni ng kanyang kaibigan. Pinayuhan siya ng tinawag na huwag lumabas ng kotse. Sinabi kay Vinni ng kanyang friend na kunin ang mga plaka ng mga kotseng nangharang sa kanya.Kinuha ng mga bodyguards ni Fernando ang lisensiya ni Vinni. Nagpulasan sila ng makita ang pangalan sa lisensiya. Ni-relay ni Vinni ang mga plaka ng mga kotse sa Land Transportation Office. Doon nalaman na ang convoy ay kay Fernando. Pinatawag si Fernando ni DILG Secretary Jonvic Remulla sa Camp Crame. May office kasi ang DILG secretary sa loob ng Camp Crame. Sinuntok ni Remulla si Fernando sa mukha. Bagsak! Sinuntok uli. Bagsak uli. Pagbangon uli ni Fernando, sinakal siya ni Remulla. Lumabas ang dila ng gobernador sa sakal. Inawat si Remulla ng kanyang mga bodyguards na pulis. O, ayan, ang buong drama, ayon sa aking tweety bird”.