Pababain ang presyo ng petrolyo, solusyunan pagtaas ng presyo ng pagkain - Bam

 Matapos aminin ng isang mataas na opisyal ng gobyerno na ang pagtaas ng inflation rate ng bansa ay dahil sa mataas na presyo ng petrolyo, inulit ni Sen. Bam Aquino ang panawagang isabatas ang panukala niyang itigil ang excise tax sa produktong petrolyo sa ilalim ng Tax Reform for Acceleration and Inclusion (TRAIN) Law.

 “Sa wakas, inamin na ng gobyerno na ang pagtaas ng presyo ng pagkain ay dahil sa taas ng presyo ng petrolyo. Pababain na natin ito. Itanggal na ang TRAIN Tax sa petrolyo,” ani Sen. Bam, isa sa apat na senador na bumoto laban sa ratipikasyon ng TRAIN Law. Tinutukoy ni Sen. Bam ang pahayag ni Agriculture Sec. Manny Pinol sa pagdinig ng budget ng ahensiya na ang mataas na presyo ng petrolyo ang pinakamalaking dahilan sa mataas na inflation rate, na pumalo sa 6.4 percent noong Agosto. “Sana kasabay ng pag-amin ay gawing urgent na din ang Bawas Presyo Bill para mabigyan naman ng kaunting ginhawa ang mga Pilipino,” wika ng senador, na tinutukoy ang Senate Bill No. 1798.

Layon ng panukala ni Sen. Bam na suspindihin at i-rollback ang excise tax sa produktong petrolyo sa ilalim ng TRAIN Law kapag ang average inflation rate ay lumampas sa taunang inflation target sa loob ng tatlong buwan. Iginiit ng senador ang kahalagahan ng agarang pagsasabatas ng panukala dahil may nakatakda na namang P2 dagdag na excise tax sa produktong petrolyo sa ilalim ng TRAIN Law sa Enero 2019.

“May krisis na ang Pilipinas sa bigas at taas presyo. Utang na loob, pagtulungan na natin ito alang-alang sa mga Pilipinong hirap na hirap nang umahon,” wika ni Sen. Bam.

Sinuportahan ni Vice President Leni Robredo ang pagsasabatas ng panukala habang nagsumite naman ang mga miyembro ng minorya sa Kamara -- Miro Quimbo, Jorge “Bolet” Banal, Jose Christopher Belmonte, Gabriel Bordado Jr., Raul Daza, Jocelyn Limkaichong, at Josephine Ramirez-Sato – ng kanilang bersiyon ng panukala.(P.R)