Kasuhan ba si Pulong Duterte sa P51-B?

By Mortz C. Ortigoza

Talo ni Davao City 1^st District Congressman Paulo “Pulong” Duterte ang mga budget sa Department of Agrarian Reform (DAR), Philippines Coast Guard, at modernization ng military kontra China.

Sa pinalabas na pahayag ni House Appropriation Committee Chair Elizaldy Co, si Polong ay merong allocation o pork barrel na tumataginting na P51 billion noong 2019 -2022 termino niya. Sa panahon na iyan ay Presidente ng Pinas ang Tatay Digong niya.

POLITICAL PATRONS. (From left and clockwise): Davao City 1^st District Rep. Paulo “Pulong” Duterte, President Ferdinand Marcos, Jr. and his first cousin House Speaker Martin Romualdez.

Ito ay pinakamalaki na alokasyon na naibigay sa isang Kongressman magmula ng tayo ay magsimula sa Commonwealth Government noong 1935. Mas malaki ito ngayong taon sa P9.392.29 billion budget ng DAR,  P29, 420, 681, 000 sa Coast Guard at P40 billion sa Horizon -3 o last phase ng modernizasyon ng military para labanan ang mga paghihimasok ng China sa mga teritoryo natin.

Parti ng pera sa Coast Guard ay galing sa nabigong P650 million confidential and intelligence fund (CIF) ng kapatid niyang si Vice President at Department of Education Secretary Sara noong tangalan siya nina Speaker Romualdez ng CIF dahil umaangal ang taong bayan sa walang katuturang pagwaldas ng salapi ng bayan at banta sa ambisyon ni Romualdez na papalit sa pinsang buo niyang si President Bongbong Marcos.

Sa pagkakaalam ko karamihan sa 309 congressmen natin ay may P1 bilyon – P4 billion kada taon na alokasyon na nakalagay sa mga departamento gaya ng Public Works & Highway at Health kung saan sila ang maghahanap ng benipesaryo at of course favored contractor. Sanamagan! Wala sa lugar ang ganyang pagkaayos.  Ang trabaho nila dapat ay gumawa ng batas at hindi maghanap ng mga kontraktor at suppliers para sa kupit nila, este, sa mga constituents nila.

Ani Pulong sa kanyang website noong January 9:

“I also would like to inform all Dabawenyos, most especially in my district that the House leadership has taken out P2 billion for your NEP (National Expenditure Program) budget for the district and left only a measly P500 million to Dabawenyos this year. To all Congressmen ganging up on us, do not give me that kind of B.S because I will not starve to death if you take my budget away. Ang kawawa is yung mga Dabawenyo na bumuto kay PBBM”.

Umuusok sa  galit sa Cebuano si Polong sa prayer rally sa Davao City noong January 28:

“Pangitaon man tag fifty bilyon. Kami mga congressmen lobbyist man lang kami. “Ah Speaker, DPWH bi muhangyo ko bi coastal road akong tapuson kay gisugdan sa iyang tonto nga igsoon wa humana. Ginoo ko! (Hinahanapan ako ng P50 billion. Kaming mga congressmen lobbyist lang naman kami. “Ah Speaker, DPWH hihiling ako ng coastal road dahil tatapusin ko dahil inumpisahan ng loko na kapatid niya na hindi tinapos. Diyos ko!),” ani Pulong sabay banat kay PBA Partylist Margarita Nograles na pinagsusupetsahan niyang nagkakalat ng balita na binulsa niya ang bilyo-bilyones na pera.  Si Nograles ay sinasabi ng batang Duterte na tatakbo sa pagka mayor ng Davao City sa susunod na eleksiyon.

Ani dating Senator Antonio Trillanes na madaling masuri kung saan dinala ni Pulong ang P51 bilyon sa pamamagitan ng isang technical inspection at special audit ng Commission on Audit (CoA) sa mga flood controls, farm-to-market roads, at mga buildings projects niya.

“It’s so scandalous! Nanawagan ako sa CoA na mag-conduct kayo ng special audit at meron silang moto propio power kasi hindi naman kailangan e di-direct sila ng kung sino kasi independent sila per our Constitution. They investigate what they want to investigate”.

Sang ayon ako kay dating Senator Trillanes. Imbestigahan kaagad at kasuhan ng COA or sinuman na taxpayer sa Ombudsman ng Anti-Graft & Corrupt Practices Act, Plunder o iba pa pag nakitaan ng probable cause si Cong. Pulong.

Kung napunta man iyan sa 45.5 kilometers P46.8 billion Davao City Coastal Bypass Road – gaya ng sinabi niya sa prayer rally - at above board naman ang transaction ng DPWH at mga contractors walang dapat ipag-alaala si Cong. Polong. Ingay at pulitika lang ang mga namutawi sa mga bibig nila Co at Trillanes.