Pangalawang power plant malaking tulong sa bansa

 Ang pagpapatayo ng pangalawang coal-fired power plant sa bayan ng Sual ay naa-ayon sa development program ng Pangulong Duterte.

Ito ang iginiit ng mga development-oriented officials, kabilang na si Secretary Raul Lambino, ang presidential adviser for Northern Luzon.

Napag-alaman din na ang adhikain ng bagong mayor ng naturang bayan, si Mayor Lizeldo Calugay, ay sumusuporta sa mga adhikain ni Pangulong Duterte, kabilang ang pagpapalago ng ekonomiya.

Sa kanyang pagbisita sa China kamakailan, ibinalita ng Pangulo na meron sampong Chinese companies ang mag-invest sa Pilipinas na nagkakahalaga ng humigit-kumulang sa nine billion US dollars o 467 billion pesos.

Dahil sa inaasahang pagdagsa ng mga investors, lubhang kinakailangan ang sapat na supply ng kuryente sa mas mababang halaga, ayon kay Secretary Lambino.

Dinagdag pa niya na mahirapan ang ating ekonomiya na mapabilis ang paglago nito kung unstable ang power supply at napakamahal pa.

Ang singil sa kuryente sa Pilipinas ay pangalawa na sa pinakamataas sa Asia at pang-labing anim sa buong mundo, ayong sa survey na isinagawa ng International Energy Consultants (IEC).

Ang isang malaking dahilan ay ang mababang power generation capacity, ayon pa sa naturang survey.

Naniniwala si Secretary Lambino na ang lunas sa mataas na singil sa kuryente ay ang pagpapatayo ng karagdagang coal-fired power plant upang magkaroon ng sapat na supply at maiwasan na rin ang madalas na power interruption.

Mas murang malayo ang coal-fired power plant kaysa mga tinatawag na renewable sources of energy tulad ng solar power plant, windmill o geothermal plant.

Napag-alaman na ang Korea Electric Power Company  (KEPCO) ay magpapatayo ng isa pang coal-fired power plant sa bayan ng Sual na may generation  capacity na 1,000-megawatts. Ang naturang proyekto ay nagkakahalaga ng humigit-kumulang sa two billion US dollars.

Walang problema sa pollution dahil gagamitan ang naturang planta ng modernong teknolohiya na kung tawagin ay ang ultra-super critical coal-fired power plant. Ito ay nagtataglay ng “High Efficiency Low Emission (HELE) Technology” na babawasan ang greenhouse gas emission ng humigit-kumulang sa 45 percent.

Bukod pa diyan, ang naturang proyekto ay magbibigay ng mahigit sa dalawang libong  trabaho sa mga mamamayan ng Sual ang nasabing pangalawang coal-fired power plant.

Aabot sa 400 million pesos ang kikitain ng bayan ng Sual mula sa real property taxes na babayaran bawat taon ng operators ng nasabing proyekto.   ###