Mayor Bona Mariing Itinatanggi Vs. sa Pagpapatayo ng Ospital

 

MANGALDAN, Pangasinan - Mariing pinabulaanan ng lady alkalde dito ang kumakalat na alegasyon na siya umano’y humahadlang sa pagtatayo ng ospital sa first class na bayan.

 Ayon kay Mayor Bona Fe D. Parayno, walang katotohanan ang mga paratang at isa lamang itong paninira sa kanyang pangalan ng kanyang mga kalaban.

Wala rin aniyang anumang aplikasyon para sa naturang proyekto ang naipasa sa kanyang tanggapan, at wala ring sinumang lumapit sa kanya upang ipahayag ang intensyon na magtayo ng ospital sa bayan.

Giit ng alkalde, imbes na magpakalat ng maling impormasyon, mas mainam na pagtuunan ng pansin ang pagbibigay ng tapat na serbisyo sa mga Mangaldanian.

Bilang isang dating medical practitioner at isang tagapagtaguyod ng programang pangkalusugan, hindi umano tutol si Mayor Bona sa pagtatayo ng ospital sa bayan. Sa halip, bukas siya sa ideya at naniniwala siyang ito ay isang proyektong lubhang makakatulong sa mga kabaleyang Mangaldanian.

Aniya, kung may mga pribadong sektor o mabubuting puso na nais makipagtulungan sa lokal na pamahalaan upang maisakatuparan ang proyekto, handa siyang makipag-ugnayan at magbigay ng suporta.

Dagdag pa ni Mayor Bona, kung ang proyekto ay para sa kapakanan ng kanyang mga nasasakupan, hindi siya magdadalawang-isip na suportahan ang anumang hakbang na magpapabuti sa serbisyong pangkalusugan sa bayan.

Nagbabala rin si Mayor Bona sa publiko na maging mapanuri sa mga politikong inuuna ang pagpapakalat ng kasinungalingan at akusasyon kaysa sa tunay na paglilingkod sa bayan.

Ayon sa kanya, ang isang tunay na lingkod-bayan ay hindi nasusukat sa kanyang sinasabi kundi sa kanyang ginagawa para sa mga taong pinagsisilbihan niya.

Aminado ang alkalde na nasasaktan siya bilang tao sa patuloy na pagpapakalat ng maling impormasyon laban sa kanya. Kaya naman umaapela siya sa mga nagpapakalat ng mga tahasang paninira at fake news na itigil na ang pamumulitika at smear campaigning.

Patuloy namang nananawagan si Mayor Bona sa publiko na maging mapanuri sa mga impormasyong kanilang tinatanggap at huwag basta maniwala sa mga kumakalat na espekulasyon na walang matibay na batayan. (𝙈𝙖𝙣𝙜𝙖𝙡𝙙𝙖𝙣 𝙋𝙄𝙊)