Guico Ika-31 na Gobernador ng P’nan

 Progreso at paglakas ng ekonomiya ang pangako ni Governor Ramon “Mon-Mon” Guico, III sa kanyang inagurasyon na ginanap sa The Sison Auditorium, Lingayen nitong ika-29 ng Hunyo, 2022. Si Guico, na dating nagsilbi bilang Punong Bayan ng Binalonan at Representante ng Ikalimang Distrito, ang ika-31 na Gobernador ng Probinsiya ng Pangasinan.

Pangasinan Governor-elect Ramon Guico, III has formally taken his oath before presiding judge of the Municipal Circuit Trial Court of Binalonan and Laoac Judge Harriet Cabreros during his inauguration at the Sison Auditorium in capital town Lingayen, Pangasinan on Wednesday. (Photos by Cesar Ramirez)

Kabilang sa mga naisakatuparan ni Guico bilang Alkalde ng Binalonan ay ang pagpapatayo ng University of Eastern Pangasinan kung saan libu-libong residente ang nakapag-aral ng libre dahil sa scholarship at daan-daang estudyante ang nakatangap ng allowance na umabot ng P40,000 kada buwan dahil sa Tertiary Education Subsidy Program ng Commission on Higher Education.

Sa kanyang namang termino sa Kongreso, si Guico ay naging may akda ng 119 Lower House Bills at naging daan sa pagsasakatuparan ng kauna-unahang Philippine Zone Authority Industrial Park sa Pangasinan kasama ang SUMI North Philippines Wiring Corporation na magbibigay ng aabot sa 12, 000 na trabaho sa taong 2025.

Gumawa rin ng kasaysayan si Guico bilang unang Congressman na bumisita at nag-abot ng tulong sa 1,364 barangay sa 44 na bayan at 4 na siyudad ng probinsiya.

Ang bagong Gobernador ay inaasahang mangunguna sa pagbabago at progreso kasama ang Bise Gobernador Mark Lambino. Sila ang nanguna sa grupong Alyansang Guico-Lambino (AGuiLa) na nagsimula ng “Lipad Pangasinan!” – ang panawagan sa bawat Pangasinense na magkaisa para sa isang probinsiya na maunlad at mataas ang nararating.

Matapos siyang makakuha ng 885, 272 na boto at ma-proklama ng Commission on Elections bilang panalo, agad na nag-trabaho si Guico at nakipag-pulong sa mga potensiyal na investors mula sa iba’t ibang bahagi ng mundo. Nangunguna ang bagong Gobernador sa isang exploratory meeting para sa Pangasinan Eastern Western Expressway na magpapabilis ng biyahi mula sa silangan at kanluran Pangasinan at magpapayabong ng turismo sa probinsiya. Nakipag-pulong na rin si Guico kay Arch. Felino “Jun” Palafox, kasama si noong Bayambang Mayor Cezar T. Quiambao ukol sa master plan para sa Pangasinan.

Ipinakita naman ni Guico ang kanyang pagtutok sa sektor ng kalusugan matapos siyang magkaroon ng diskusiyon kasama ang mga doctor at mga pinuno ng iba’t ibang ospital sa lalawigan uko sa mga paraan at solusyon sa mga isyung pangkalusugan ng mga Pangasinense.

Pantay-pantay na opurtunidad sa trabaho, mas mataas na sahod ng mga manggagawa, modernisasyon sa sector ng agrikultura, scholarship at tulong sa mga kabataan, pagtatayo ng mas maraming economic zones, pangangalaga sa kapaligiran, pagpapapalakas ng turismo, tulong pangkabuhayan para sa mga kababaihan, suporta sa LGBTQ+ community at mga senior citizen, mabuting pamamahala, at pagpapalakas ng suporta sa basic social services – ang mga ito ay ilan lamang sa mga prayoridad ng administrasyon ng bagong Gobernador ng Pangasinan.

Mataas ang pangarap niya para sa probinsiya, subalit malaki ang tiwala ni Gobernador Guico na habang siya ang piloto ng pagbabago at progreso, at hangga’t nagkakaisa at nagtutulungan ang bawat Pangasinense, ay matayog ang liliparin ng lalawigan ng Pangasinan.