Manay Gina on Bangus Festival

Rep. Gina de Venecia

Ano po ang message nyo sa mga Dagupenyos kaugnay ng Bangus Festival?

Una, masayang-masaya po ako na makasama kayo dito sa Kalutan ed Dalan, sa ating selebrasyon ng Bangus Festival!

 Ang mensahe ko po, sana ang engradeng selebrasyong ito ay lalong magbigay sa atin ng inspirasyon para lalong magsikap na mapaunlad ang bangus industry sa Dagupan.  Kasi, ang bonuan bangus ay talagang world-class at maipagmamalaki sa buong mundo.

Ano po ba ang mga nagawa na natin para mapaunlad ang bangus industry?

Una, alalahanin natin na ang inyong Kuya Joe de Venecia ang nagtatag ng kauna-unahang hatchery ng Bonuan Bangus sa Pilipinas. Ito ay nasa BFAR, sa Bonuan Binloc. Dito nanggagaling ang halos lahat ng punla ng Bonuan Bangus sa buong bansa, at maging ang private sector at foreigners ay dito nag-aaral kung paano ang tamang pag-aalaga ng bangus.

Bukod dito, nagtayo rin ang inyong Kuya Joe ng Asian Fisheries Academy na nasa BFAR din. Ito ang pinakamagandang training facility tungkol sa fishing industry sa  buong Pilipinas.

Ang pangatlo ay ang modernong Seafood Processing Plant. Wala pong gastos ang pamahalaan sa pagtatayo ng plantang ito, dahil ang lahat ng pondo ay nagmula sa bansang Korea. Ito po ay naitayo sa Dagupan, dahil sa hiling ng inyong Kuya Joe.

Natutuwa po kami, dahil sa May 14, ay magsisimula na ang operasyon nito, kung saan dalawampung tonelada ng bangus ang nakatakdang i-proseso para ibenta sa bansang Amerika.  

Hindi nyo naitatanong, ang sistema ng processing ng ating seafood plant ay pasado na sa pharmaceutical international standard na kung tawagin ay Hazard Analysis Critical Control Points, kaya bukas na po ang pinto para ang ating mangingisda ay makapagbenta ng kanilang ani, hindi lamang dito kundi maging sa mga international markets, gaya ng Estados Unidos.  At ayon kay Dr. Westley Rosario, na siyang manager ng planta, may mga buyers na rin tayo mula sa bansang Middle East at China. Ang plantang ito ay may kakayahang magproseso ng limang toneladang isda, kada linggo.

 Malaking tulong din ito sa mga mangingisda kapag may kalamidad, dahil pwede na nilang agahan ang kanilang pag-ani upang mai-proseso ito, bago tangayin ng baha kapag may bagyo.

Ang mas maganda pa, sa pamamagitan nito, nakapagbigay tayo ng karagdagang employment opportunity para sa kababayan nating maralita.

Ang totoo nyan, nakalulungkot man, pero ang ating bayan ay medyo nahuhuli pagdating sa eksportasyon ng bangus at iba-pang aning-dagat. Pero dahil sa plantang ito, puwede nang ibenta sa pandagidigang merkado ang napakasarap na Bonuan Bangus.

Ano pa po ba ang nakikitang nyong problema sa bangus industry?

Sa huling pagbisita ko dito, nakita kong tinatangay na ng tubig-dagat ang bahagi ng dalampasigan na tinatayuan ng planta. Kaya agad po akong nakipag-usap kina DPWH Secretary  Rogelio Singson at sa ating Budget Secretary Butch Abad  upang agad na maipagawa ang seawall bilang  karagdagang proteksiyon ng ating Processing Plant. Sa kasalukuyan, hinihintay na lamang po natin ang 50 million budget para masimulan na ang paggawa nito.

May karagdagan pa ba kayong message?

Bilang kongresista, may panukala din ako tungkol sa pagtatayo ng moderno at malaking Dagupan City Fish Port, bilang suporta sa ating seafood processing plant upang ang Dagupan ang maging sentro ng fishing industry sa Northern Luzon.

May programa rin po akong pangkabuhayan sa sa mga nagtitinda ng isda. Katunayan, nitong mga nakalipas na buwan ay nagbigay ako ng pondo sa Bangus Vendors Association of Dagupan, upang lalo nilang mapalago ang kanilang negosyo.