Resuello Agresibong Nakipag Lobby sa mga Senador, DepEd Sec

Ni Mortz C. Ortigoza

BASISTA, Pangasinan – Agresibong nananawagan at lumalapit ang alkalde rito sa ilang senador at sa Kalihim ng Edukasyon sa kanilang mga tanggapan sa Maynila upang humingi ng pondo para sa pagtatayo at pagkukumpuni ng mga gusali ng pampublikong paaralan, pati na rin ng pinansyal na tulong para sa mga nangangailangan.

Ilang araw ang nakalipas nang makapulong ni Mayor Jolly R. Resuello si Senador Bam Aquino, kung saan ipinaalam niya rito ang malubhang kalagayan ng ilang imprastraktura ng paaralan dahil sa katagalan ng panahon at sa pinsalang idinulot ng mga nagdaang kalamidad.

“Ang inyong lingkod sa tulong ng Sangguniang Bayan headed by Vice Mayor Jake Perez ay nagpasa ng Resolusyon sa Opisina ni Senator Bam Aquino upang mabigyan ng pangsin at importansya ang sitwasyon ng mga gusali at silid aralan ng ating mga eskwelahan na kung saan ang karamihan dito ay nasira na at bumagsak dahil na rin sa katagalan at mga kalamidad na nagbigay pangamba sa ating mga guro, magulang, at mag-aaral,” ani Resuello.

Nakipagpulong din siya sa tanggapan ni Senador Sonny Angara hinggil sa pangangailangan ng bayang ito para sa karagdagang mga silid-aralan at gusali habang lumalaki ang populasyon ng mga mag-aaral.

“Ating sinunod na bisitahin ang Department of Education Central Office at ating naka usap si Director Erwin Lozano (under the office of DepEd Sec. Sonny Angara) sa Makati City upang ipaabot ang mga hiling na mabigyan ng pansin at importansya ang mga gusali at silid aralan ng DepEd Basista,” dagdag ni Resuello.

Sinabi ni Resuello na tinalakay niya kay Lozano ang kalagayan ng Dumpay Elementary School, kung saan ipinangangamba ng mga guro at magulang na anumang oras ay bumagsak ang kisame ng isa sa mga gusali rito, bukod pa sa mga tulo ng tubig tuwing umuulan. Humiling din si Resuello sa tanggapang iyon na magtayo ng bagong gusali ng paaralan upang maging maginhawa ang pag-aaral ng mga estudyante. Pinalisahan din ng alkalde ang pagtatapos ng Don Alejandro Elementary School na matagal nang inaasam ng mga stakeholder.

“Nasabi naman din po nila na ito po ay magagawa for completion sa tulong at suporta ng ating mahal na Congressman Honorable Mark Cojuangco,” ani ng Alkalde.

Nakipagpulong din siya kay Senador JV Ejercito kung saan humingi siya ng pondo mula sa Assistance to Individuals in Crisis Situation (AICS) at Tulong Panghanapbuhay sa Ating Disadvantaged/Displaced Workers (TUPAD) upang mapagaan ang hirap ng mga kapos sa pananalapi rito.

“Makakaasa po kayo na patuloy lang po tayong mag seserbisyo at tulong para po sa ating mahal na bayan ng basista,” aniya.