Batas sa Vest, Light sa 2-3 Gulong na Sasakyan Sinuri

 Ni Mortz C. Ortigoza

SAN FABIAN, Pangasinan – Sinusuri ng mga miyembro ng Sangguniang Panlalawigan sa pamumuno ni Bise Gobernador Mark Ronald Lambino ang ordinansang ipinasa sa bayang ito na nagpapatibay sa ordinansa ng pamahalaang panlalawigan ukol sa pagamit ng high-visibility reflective vest at light para sa mga rider ng mga sasakyang may dalawa at tatlong gulong.

Sa Ordinansa Blg. 4, Serye 2026 na isinumite ng mga miyembro ng Sangguniang Bayan dito para sa pagsusuri  ng Sangguniang Panlalawigan sa Lingayen, Pangasinan, ang ordinansa ay may pamagat na:

"Isang Ordinansa na Nag-aatas ng Mas Mataas na Visibility sa Gabi sa mga Rider ng Motorsiklo, Traysikel, Bisikleta, E-Trike, at E-Bike sa Pamamagitan ng Paggamit ng High-Visibility Reflective Vests para sa Lahat ng Rider ng Motorsiklo at Traysikel, at Reflective Vests at/o High Visibility Lights para sa mga Rider ng Bisikleta, E-Bike, at E-Trike Habang Bumabiyahe sa mga Lansangan ng Lalawigan ng Pangasinan mula 6 P.M. hanggang 6 A.M. at Pagpapataw ng mga Parusa Rito."

Ang batas ay itinaguyod (sponsored) nina Sangguniang Panlalawigan (SP) Members Marinor B. de Guzman at Jerry Agerico B. Rosario, at magkakasamang itinaguyod (co-sponsored) nina SP Members Joyce D. Fernandez, Raul R. Sabangan, at Martin Raul S. Sison II.

PROVINCIAL ORDINANCE

 Ipinag-uutos ng Provincial Ordinance No. 325-2024 noong Agosto 1, 2024 ang pagsusuot ng high-visibility reflective vest, luminous-colored garments at paglalagay ng pailaw mula alas-sais ng gabi hanggang alas-sais ng umaga. Saklaw ng ordinansang ito ang lahat ng drivers at rider ng motorsiklo, tricycle, bisikleta, e-bike, at e-trike. Ang sinumang lalabag sa batas na ito ay paparusahan o pagmumultahin gaya ng sumusunod:

1. First Offense Warning; 2. Second Offense P1,000 fine; 3. Third Offense P2,000 fine; 4. Fourth Offense P5,000 fine and/or imprisonment of not more than 1 year at the discretion of the court.

Si Pangasinan 4th District Board Member Jerry Agerico Rosario ang pangunahing may akda ng ordinansa. Ayon sa kanya, nasa dalawang katao ang namamatay sa vehicular accident sa Pangasinan kada-araw. Karamihan ay kinasasangkutan ng mga motorcycle riders.

Ang Provincial Ordinance Violation Receipt (POVR) ay nasa ilalim ng 𝗣𝗿𝗼𝘃𝗶𝗻𝗰𝗶𝗮𝗹 𝗢𝗿𝗱𝗶𝗻𝗮𝗻𝗰𝗲 𝗡𝗼. 𝟰-𝟮𝟬𝟮𝟱 na unang iminunkahi noong Nobyembre 7, 2025 sa Sangguniang Panlalawigan dito.

Ito ay may pamagat na: An ordinance establishing a provincial ordinance violation receipt system to achieve a more systematic and orderly issuance of receipt and collection of fines and penalties for violation of ordinances of the Province of Pangasinan.