Pangalawang power plant sa Sual suportado ni Pangulong Duterte

LINGAYEN – Ang plano ni Gov. Amado “Pogi” Espino III na gawing investment destination ang Pangasinan ay lalong lumakas ang tsansang maisakatuparan matapos ihayag ng Pangulong Duterte ang kanyang pagsang-ayon sa pagpapatayo pa ng karagdagang coal-fired power plant sa bansa upang masawata ang maaring pagkakaroon muli ng krisis sa kuryente.

President Rodrigo Duterte, second from left, poses with South Korean President Moon Jae-in for a photo during a meeting at the presidential Blue House in Seoul, South Korea last year.

Magugunita na isa pang coal-fired power plant ang balak ipatayo sa bayan ng Sual ng Korean Electric Power Corporation na nagkakahalaga ng two billion US dollars. Ang naturang power plant ay may generating capacity na 1,000 megawatts.

Ang pagpapatayo ng power plant ay isa sa mga pinag-usapan sa pagbisita ni Pangulong Duterte sa South Korea noong nakaraang taon.

Sa nasabing bilateral meeting ng Pangulo at ni President Moon Jae-in ng South Korea, hinikayat ni Pangulong Duterte si President Moon na dagdagan pa ng South Korea ang investment sa Pilipinas,  lalong-lalo na sa energy generation, manufacturing, automotive, food processing at agri-business.

Naging positibo naman ang tugon ni President Moon at sinabi pa nito na “very special” ang turing ng South Korea sa Pilipinas.

Dahil dito lalong lumakas ang pagkakaton na matuloy ang pagpapatayo sa Sual ng isang state-of-the-art coal-fired power plant. Gagamitan ito ng advanced technology upang maiwasan ang pollution.

Ito ay ikinatuwa ng maraming mamamayan ng bayan ng Sual dahil nangangahulugan ito ng dagdag na humigit-kumukulang sa dalawang libong trabaho sa mga mamamayan ng Sual.

Magkakaroon din ng humigit-kumulang na P800 million karagdagang revenue bawat taon para sa probinsiya, sa bayan ng Sual, at Barangay Baquioen na kung saan ipapatayo ang naturang planta ng kuryente.

Sumang-ayon din ang project proponent na bigyan ng discount sa singil ng kuryente ang bayan ng Sual bilang host municipality.

Sa pamamagitan ng karagdagang pondo na manggagaling sa pangalawang power plant, maipapatupad ng municipal government ang mga mahalagang proyekto tulad ng hospital, seaport, agricultural modernization, expanded scholarship program para sa kabataan, resettlement project para sa lahat ng informal settlers, at iba pa.

Ang bayan ng Sual ay binansagang Energy City of Pangasinan sa pamamagitan ng resolution ng Sangguniang Panlalawigan na suportado ni Governor Amado Pogi Espino III.